Uitzending Gemist

It Paad Werom

Yn dizze ôflevering giet it oer it doarp Dearsum dêr't de bewenners op eigen krêft yn harren enerzjy behoefte foarsjen woenen. In soad minsken sille it noch wol witte, mar der binne ek - foaral jongeren - dy't der nea fan heard hawwe: dat it lytse greidhoeke-doarpke Dearsum yn de jierren ?70 en ?80 wrâldferneamd wie. Elkenien woe it wûnder fan Dearsum sjen: se kamen mei busfollen folk út alle wynstreken nei Dearsum. Japanners, Koreanen en Brazilianen knoffelen it hiem fan boer Durk Schaap op om by him efter hûs in Fiat 500-motorke oan it wurk te sjen dy't op stront rûn. It wûnder fan Dearsum wie in biogas-ynstallaasje dy't kowestront omwurke ta gas; wêr't it doarp foar in part har stream fan krige. In eigen wynmûne soarge foar de rest. Yn earste ynstânsje woenen de Dearsummers hielendal los fan it elektrisiteitsnet. Autark wie it toverwurd dêr't de plannemakkers it doarp mei efter har plannen krigen. In eigen enerzjysintrale dy't draaie soe op wyn en kowestront, oanlevere troch de Dearsummer boeren. It wie de tiid fan de twadde enerzjykrisis. De Arabieren hienen al in pear kear de oaljekraan ticht draaid, wêrtroch?t yn Nederlân de benzine op de bon gie. De autoleaze snein stammet ek út dy tiid. Yn dizze 2e ôflevering fan It paad werom geane we op besite by de minsken dy't in haadrol spilen yn it enerzjyprojekt fan doe. Ant Wiersma siet yn Doarpsbelang, Gerjan Zanstra wie foarsitter en as libbensmiddeltechnolooch nochal ynteressearre yn biogas. René Poppen wie wethâlder fan Raerderhim en waard hieltyd mear it gesicht. We sjogge ek efkes efter op it hiem by Durk Schaap. Hy krige al dy bûtenlanners oer de flier. It spul leit der noch krekt sa by as 30 jier ferlyn. We fine sels noch in pear folders út dy tiid. Allinnich it Fiatmotorke is fuort.

Bron: KRO-NCRV